SANTBENITO

SANTBENITO

aliis SAMBENITO, an quasi Saccus benedictus, an Sancti Benedicti scil. vestis? habitus est poenalis, irrogari solitu ab Inquisitoribus, origine tali. Cum multa in Hispaniae regno essent depravata Mauris Iudaeisque cum Christianis promiscue versantibus, nullô non commercii genere, Hispali primum quaestionibus arcano habitis, de sontibus qui videl. hâc familiaritate seducti Christiana sacra deseruissent, gravissimis poenis vindicatum, et, maiori commisso delictô, igne post diuturnum carcerem et tormenta necati apostatae: leviori de causa ignominia familiae perpetua inusta est: non pauci bonis publicatis ad aeternos carceres damnati. Rubra crux obliquis radiis in crocea veste, quam

Sancti Benedicti vocant, plerisque data insignis, a ceterisque discreta, ut essent documento, et magnitudine supplicii terrerent alios, Bzovius A. C. 1478. §. 14. Hodieque suspecti de haeresi sive leviter, sive de vehementi, iniungitur nonnumquam, ut, pro delicti qualitate, ad tempus Sambenitum gestent, uti docet Phil. a Limborch Historiâ Inquisit. l. 4. c. 31. Vide et supra ubi de Sacco Benedicto, item ubi de Reatus indumentis.